Dat Plattdüütsche Book vun´t Johr 2013

Dat is doch dull, wo wiet een blots mit en beten swatte Black op witt Papeer komen kann. Och ja, en lütt beten root hett ok noch Platz kregen. Grafik un Riemels snackt för sik un maakt dat Book to Kunst.

Dat Plattdüütsche Book vun`t Johr 2013 is vun en Profi mookt worden. Dat is to marken. Rainer Prüss is en Meldörper Jung. Een kunn ok seggen: de Keerl is en echten Dithmarscher. En Oog för`t Feine, dat hett he. Schlicht, eenfach, kloor un schöön is sien Book „Beten wat in swatt un witt vun Neihmaschien un Fensterkitt“. Dor steekt Riemels vun Musik, Technik, Kultur, Urlaub, dumm Tüüch un Kinnerkraam binnen. Nich to finnen in dat Book sünd Themen as vertellte Döntjes ut dat Leven oder vun Buernhoff- un Landromantik. Dat deit goot. Dor gifft dat in`t Plattdüütsche mehr as noog vun.

Över de Riemels kann een bi`n Lesen nohdenken, smustern, grienen, sik wunnern. He kriggt Themen tofoten, de sünst lever ünner`n Disch kehrt warrt – wenn Minschen to`n Biespeel gruselig un heel leeg mit Butenlänners ümgaht – blots wegen de annere Huutfarv. Wo Vöroordele sik breet mookt, door fint Rainer Prüss Wöör. He hett en Oog op de Welt, so as se hüütigendags is.

Swatt un witt – so süht dat Book ut. Ok de Texten hebbt ehr swatten un ehr witten Sieden. De witten, de sünd licht un laat uns smustern, de swatten laat den Leser ok mal deep de Luft anholen. Man eendoont, wat nu swatt oder witt – een höört eerst op mit Kieken un Lesen, wenn dat Book dörch is. Keen Wunner bi de velen Ideen, de door binnensteken doot. De Schrieversmann speelt geern mit de Spraak.

De Pries för dat plattdüütsche Book vun`t Johr warrt jeedeen Johr vun de Carl-Toepfer-Stiftung in Hamborg utlöövt. Blots Böker, de sunnerlig ut all de velen anneren ruutsteken doot, köönt den Pries kriegen. Door geiht dat na kloor üm dat, wat in dat Book to lesen steiht, ober ok de Ümslag, dat Papeer, de Oort un Wies, woans dat Book fertigt is, speelt en grote Rull. All dat hett Rainer Prüss mit sien Book levert. Wenn he nu vörher noch en kunnigen Lektor hatt harr, denn weer dat meist perfekt ween. De Fehlerdüvel sitt noch an manch een Steed doorbinnen. Man door kann een överwech kieken. To perfekt is je ok meist nich uttoholen…

Goot utholen kann een den Schrieversmann un Diplomdesigner sülvens. Rainer Prüss is een netten een. He lacht, kiekt sik de Welt nipp un nau an, schrifft un sett allens mit goot Oog un veel Hart üm. So kann so`n Book op de Welt kamen.

Schaad, dat sik keen Verlegger erbarmen kunn. De harrn em aflehnt. Oder doch nich schaad? Dat Priesgeld vun 2000 Euro mütt he denn je al mal nich delen. Dat schall em vun Harten günnt sien!

Weer ik nu en Engelschmann – sä ik blots: „Mien Jung, well done!“

Mehr dorto:
www.rainer-pruess.de

Über Christianne Nölting

Christianne Nölting

Im Norden geboren. Im Norden ausgebildet. Dem Norden tief verbunden. Voll der Norden in Person!

Keine Meinungen bisher.

Wir freuen uns auf deine Meinung. Schnell dann bist du der Erste.

Hinterlasse deine Meinung