Dat blaue Band

Wi Buern köönt dat blaue Pressengarn ut Plastik, wo de Strohklappen mit bunnen sünd, ja meist richtig goot bruken. All de Buern wohrt dat blaue Band op, wenn se de Strohklapp utstreut hebbt.

De meisten hebbt darvun een groten Sack in de Komer stahn un meist ok wat darvun in de Tasch, un denn warrt allens darmit heil mookt. De Tuun, de Anhängerklapp, dat Hecktor, allens, wat du di vörstellen kannst. Un wenn dien Gürtel kaputt geiht, kannst du en blauet Band darför nehmen.

As wi mit de Familie annerletzt in Urlaub weern, dar heff ik to mien Kinner vörher seggt: „Lüüd, in Flughaven, ant Gepäckband: All hebbt se dezent musterte oder eenfarvige dunkelblaue, dunkelgraue oder schwatte Kuffers, un wi jüst so, un darmit wi ant Gepäckband unse Koffers gau wedder rutfindt, geiht nu jedeen vun ju in den Kalverstall, holt sik en blauet Band un bind dat üm sien Koffer rüm!“ Un ton Glück weer dar woll keen anner Buernfamilie ünnerwegens, un so weern wi de eersten, de vun dat Gepäckband wedder weg weern, un dat mookt wi nu jümmers so.

Un as ik nülichs mien ölltste Dochter vun de Klassenfohrt afhoolt heff – se weer in Wien west un keem mit den Nachtog trüch – dar keem se ut den Waggon un harr ehr Koppkissen un ehr Wulldeck för den Nachttog mit en blauet Band an ehren Koffer fastbunnen. As ik dat sehg, dar wörr mi richtig warm ümt Hart, ik kreeg ganz natte Ogen, un ik heff dacht: Es is nich allens ümsünst. Es is nich allens vergebens. So nehmt se doch an wat an vun ehrn Vadder, dar blifft doch wat hangen. Ok wenn dat blots dat blaue Band is. Dat is beter as nix.

De Vertellen is ut dat Book:

Matthias Stührwoldt: „Dat blaue Band“; Quickborn-Verlag 2013

De Verlag hett Verlööv geven, dat wi de Texte hier wiesen dörft. Dorför seggt wi groten Dank!

Mehr dorto:

www.Quickborn-Verlag.de

De Schrievwies is ut dat Book „Dat blaue Band“ vun Matthias Stührwoldt övernahmen worden.

Über Christianne Nölting

Christianne Nölting

Im Norden geboren. Im Norden ausgebildet. Dem Norden tief verbunden. Voll der Norden in Person!

Keine Meinungen bisher.

Wir freuen uns auf deine Meinung. Schnell dann bist du der Erste.

Hinterlasse deine Meinung