Twee Riemels: Hein Hoop

Hein Hoop hett op Holtbildhauer leert un hett Kunst in de USA studeert. He hett von 1927 bet 1986 leevt. In en ohlen Kaat an`n Diek vör Vollerwiek op de Halvinsel Eiderstedt harr he sien Warksteed un dor hett he ok utstellt. Hein Hoop weer rundüm Künstler. He is nich blots mit sien Skulpturen un Biller bekannt worden, sunnern ok as Schrieversmann op Hoch- un Plattdüütsch. Sien satirischen Texte hett he nich blots för de „Münchner Lach- und Schießgesellschaft“ schreven. Leder vun em hebbt Lüüd as Hannes Wader, Volker Lechtenbrink un Knut Kiesewetter en Melodie geven. Vele vun sien Texten hett Hein Hoop op Plattdüütsch schreven. Hier sünd twee Riemels vun em, de dat in sik hebbt. Ruutkamen in dat Book „Pustewind“ vun`n Quickborn-Verlag.

Lieschen

Ehr Leven weer de FKK,
man nu is Lieschen doot.
Dar liggt se nakend up de Bahr.
De Andeelnahm is groot.

En Fraag hangt lurig in de Luft:
„Treckt man sik an or ut,
wenn`t rutgeiht na de Fredensgruft?-
Wiest man de blanke Huut?“

De Böversten von`n Naaktvereen
holln Raat mit blanken Moors.
An`n Drüttdag kam`n se övereen:
„Wi fahrn den harten Kurs!“

De Truertog geiht ohne Plünn
(tominnst de Frieluftgrupp),
blots vörn an`t Lief en swarte Binn,
un dar steiht „Lieschen“ drup.

Swarte Tokunft

Een Adebar gung Kinner söken
nerrn in de Wischen un up`t Moor,
man narms höör he en Baby blöken.
He kunn nix maken, weer keen dar.

An Abend seet he up dat Reitdack
un bi em to sien truet Hart.
De twee harrn vör den Slaap en Klöönsnack.
He seeg de Tokunft pickernswart.

„Ik hang dat Fischen an den Nagel.
Laat Babies angeln, wer da will!
De Minschen hebbn doch all en Vagel,
se ruineern uns dör de Pill!

In`t Moorlock röögt sik narms mehr Leven,
keen Baby pliert mehr dör den Farn.
De Minsch nimmt uns de Freid an`t Geven,
un dar schallst nich katholsch bi warrn!“

Hein Hoop: „Pustewind – Plattdeutsche Gedichte för Lütt un Groot“, Quickborn-Verlag, 2010

De Verlag hett Verlööv geven, dat wi de Texte hier wiesen dörft. Dorför seggt wi groten Dank!

Mehr dorto:

www.Quickborn-Verlag.de

De Schrievwies is ut dat Book „Pustewind – Plattdeutsche Gedichte för Groot un Lütt“ övernahmen worden.

Über Christianne Nölting

Christianne Nölting

Im Norden geboren. Im Norden ausgebildet. Dem Norden tief verbunden. Voll der Norden in Person!

Keine Meinungen bisher.

Wir freuen uns auf deine Meinung. Schnell dann bist du der Erste.

Hinterlasse deine Meinung