Plattdüütsche Döntjes

Op Platt vertellt de Lüüd sich keen Witze. Se vertellt sik Döntjes. In`n Quickborn-Verlag is een ganz Book dormit ruutkomen. Voll der Norden dörf een poor dorvun wiesen.

De groote Brüch

Dar fahrt een Familie över`n bannig groote Brüch un warrt op de anner Siet vun de Polizei anholen: „Ik gratuleer ok`“, seggt de Putz, „Se sünd de hunnertdusendste, de över disse Brüch fahrt is un so hebbt Se dusend Euro wunnen!“

„Dat is ja fein“, seggt de Mann an`t Stüür, „denn kann`k ja nu doch noch mienen Föhrerschien maken!“

„Höört Se man nich op em“, seggt de Fruu, de op de Bifahrersiet sitt, to den Putz, „he is besapen!“ Un dar röppt op`n Mal de Opa vun achtern: „Ik heff jo dat ja glieks seggt: mit dat klaute Auto kaam wi nich wiet!“

De eerste Krach

Christa is jüst acht Weken verheiraat, dar röppt se ehr Mudder an un huult in dat Telefon: „Wi hebbt unsen eersten Krach hatt!“

„Ach, dat maakt nix, mien Deern, dat kümmt je överall mal vör!“

„Dat mag ja ween, Mama, aver wo schall ik nu mit de Liek hen?“

Du segg mal…

Sibylle fraagt ehr Tante: „Du, segg mal, Tant Anna, worüm hebbt du un Onkel denn noch keen Kinner?“

„Weetst du, Sibylle“, antert Tant Anna, „de Adebar hett uns noch keen bröcht!“

„Ach so“, sinneert Sibylle, „wenn ji noch an den Adebar glöövt, dennso wunnert mi dat nich!“

Moorbäder

Dokter Kalund seggt to Korl Hinners: „Deit mi leed Korl, aver ik heff keen gode Naricht för di, du warrst woll nich mehr lang leven!“

„Hool op“, antert Korl, „kannst du mi denn gar nich mehr hölpen?“

„Een Deel kann`k di noch verschrieven, dat sünd Moorbäder!“

„Un dat schall hölpen“, sinneert Korl.

„Hölpen jüst nich“, meent Dokter Kalund, „aver so gewöhnst du di al `n beten an de natte kole Eer!“

 

Ut: Plattdüütsche Döntjes, Quickborn-Verlag, 2010

www.Quickborn-Verlag.de

Dorför, dat de Text hier wiest warrn dörf, hett de Verlag Verlööv geven. Wi dankt dorför. De Schrievwies is ut dat Book övernahmen worden.

Dat Plattdüütsche hett noch veel mehr as Döntjes to beden. In de tokamen Tiet warrt wi op „Voll der Norden“ jeedeen Week nee´e un klassische Texte vörstellen. De Platt geern mag, schull beter goot oppassen, denn vele vun de Vertellen gifft dat nich mehr to köpen.

 

 

Über Christianne Nölting

Christianne Nölting

Im Norden geboren. Im Norden ausgebildet. Dem Norden tief verbunden. Voll der Norden in Person!

Keine Meinungen bisher.

Wir freuen uns auf deine Meinung. Schnell dann bist du der Erste.

Hinterlasse deine Meinung