Jichenswo in Noorddüütschland: de Dörpsbökeree…

Wenn du jichenswo in Noorddüütschland en geel Telefonhuus an de Straat stahn sühst, denn nehm den Foot vun`t Gas! Brems so gau du kannst! Dat kunn sien un du steihst glieks vör de Dörpsbökeree – oder den Bökerhöker? Wi kiekt maal in!

Dörpsbökeree maal anners!

 

Een Dann vör de Döör passt op. Mit ehr Twiegen hoolt se de Wacht! Wi laat uns nich afholen. De Döör is vele Dusend Maal apen un to maakt worden – domols as dat lütte gele Huus noch en Telefon in sik sitten harr. Dat weer in de Tiet, as de Lüüd mit Lüttgeld in de Hand binnenin stahn un sik mit de wiede Welt buten verbunnen hebbt. De een oder annere hett flucht – wull noch wat Wichtiges loswarrn – man de Groschens weren all. De Fofftigpenns ut de Büxentasch harr de dore Apparaat ok al sluukt. Ahn Gnaad harr dat Sabbeln so een Enn.

Wat door woll binnensteken deit?

De Geldsluuker is ruut ut den gelen Kassen. Fofftigpenns-Stücken gifft dat ok al lang nich mehr – liek so as de Groschens un de Mark. Man een Saak is bleven: du kannst di jümmers noch vun hier ut mit de wiede Welt verbinnen. Wi luschert maal rin, wat dor allens so för goden Kraam versteken is.

Laat uns maal inkieken!

Hier finnst du mehr as wiede Welt. Hier gifft dat vun allens wat – ok ut Tieden, de al lang ween sünd. Dat passt doch goot to dat lütte gele Huus, dat ok sien Tied achter sik hett. Oder doch nich? Se hebbt sik drapen: de ole Zell un de Böker. Allens nich mehr ganz frisch – allens liekers goot to bruken. Jümmers noch schickt se Lüüd op Reisen.

Böker, Böker, nix as Böker!

Wenn dat lütte gele Huus di inlaadt un een vun de Böker di ansnackt un sik mitsnackt hett, denn vergeet nich: Fofftig Cent wüllt in den Pott! Vellicht klimpert jo graad en poor Geldstücken in dien Büxentasch? Dat Weckglas töövt al dorop. Dat nimmt ok geern een Euro.

Vergeet dat Betahlen nich!

Über Christianne Nölting

Christianne Nölting

Im Norden geboren. Im Norden ausgebildet. Dem Norden tief verbunden. Voll der Norden in Person!

Keine Meinungen bisher.

Wir freuen uns auf deine Meinung. Schnell dann bist du der Erste.

Hinterlasse deine Meinung